<<    <     Sang Prabu Sane Ngrahayuang     22     >    >> 
Hyang Yesus Maurip Sekadi Jati Mula
275 Wenten cerita sujati saking Cakepan Sucine indik Hyang Yesus maurip sekadi jati mula.
276 Risampune Hyang Yesus padem,
layon Idane kagenahang ring kuburan gua sane anyar.
Malih kalih dina,
ring rahina Redite semengan,
wenten anak istri sane sampun pracaya ring Hyang Yesus mrika ka kuburane punika.
Anak istri punika jagi ngaminyakin layon Hyang Yesuse nganggen minyak sane miyik,
sekadi pula-pali anak Ibranine.
Risampune ipun rauh ring kuburane,
dapetanga guane sampun mabukak lan layon Hyang Yesus nenten wenten irika.
277 Rika raris anake istri punika gelis-gelis ngrereh para sisian Hyang Yesuse.
Nah risampune rauh irika,
anake istri punika matemu sareng dane Petrus lan dane Yohanes.
Raris anake istri punika nyeritayang indik layon Hyang Yesuse sampun ical.
278 Mireng paindikane punika,
dane Petrus lan dane Yohanes malaib-laiban mamargi ka kuburane punika.
Risampune rauh ring kuburan,
raris dane Petrus macelep ka tengah kuburan guane punika,
dapetanga kain pengaput layon Hyang Yesuse sampun ring tanahe.
Raris dane Yohanes pada macelep ka tengah kuburan guane punika.
Nyaksiang paindikane punika,
raris dane Yohanes pracaya Hyang Yesus sampun maurip sekadi jati mula.
Risampune punika,
raris dane Petrus sareng dane Yohanes budal.
279 Nah kacerita mangkin,
ring dina wengine,
para sisian Sang Hyang Yesuse mapunduh ring kamare sane makunci,
krana ajerih kapining para pemimpin agama Ibranine.
Nah duk punika,
jeg saget ngadeg Sang Hyang Yesus ring arepan ipune.
Saha Ida nunjukin tangan lan cokor Idane sane matatu,
muktiang Ida maurip sekadi jati mula.
Kenten pada,
petang dasa dina suennyane Sang Hyang Yesus sering ngedengang angga ring para sisian Idane muktiang Ida maurip sekadi jati mula.
280 Raris,
Sang Hyang Yesus masabda sapuniki,
281 “Tiang lakar ngicen kuasa tekening cening tatkala Roh Sang Hyang Tunggal tedun.
Keto mawinan cening lakar dadi saksi unduk Tiange ngawit uli negara anak Ibrani kantos ka saluirin gumine.”
282 Raris Sang Hyang Yesus munggah ka swarga nenten tios genah Sang Hyang Tunggale.
Nah,
irika raris,
para sisian Idane lunga ka kota Yerusalem nyantosang kuasan Roh Sang Hyang Tunggal.
Penuntun mabligbagan ring pasamuan:
1. Ngaturang penyuksma.
“Ngiring ja iraga ngaturang suksma mangkin. Semeton jagi ngaturang suksma indik napi?”
2. Ceritayang ja pakeweh semetone suang-suang raris iraga saling tunas icayang.
“Napike semeton wenten pakeweh mangkin?”
3. Ngwacen utawi mirengin paplajahane puniki.
4. Saurin ja pitakenne puniki:
“Napi sane plajahin iraga indik Sang Hyang Tunggal ring ceritane puniki?”
“Napi sane plajahin iraga indik manusa saking ceritane puniki?”
“Sekadi napike sapatutne iraga nyalanang idup manut pengajahane puniki?”
“Kapining sirake sapatutne iraga nyeritayang malih ceritane puniki?”